ՀՀ քաղաքացի Քյարամ Ավդալյանին պատկանող ոչխարների հոտը Լճաշեն գյուղի մշակովի ցանքատարածքներում արածավարելու պատճառով Ք.Ավդալյանի եւ ցանքատարածքների սեփականատերերի միջեւ 06.11.06թ.՝ ժամը 16-ի սահմաններում առաջացել է վիճաբանություն, ինչը  վերածվել է քաշքշոցի, որի ժամանակ Ք.Ավդալյանը  բռունցքով հարվածել  եւ մարմնական վնասվածք է պատճառել  Ավետիք Մարգարյանին, իսկ վերջինս բռունցքներով հարվածներ է հասցրել Ք.Ավդալյանին:

Դեպքի վայրից Ք.Ավդալյանը դիմել է փախուստի եւ  շուրջ 2 ժամ  հետո, վիճաբանության ժամանակ ստացած թոքի պատռվածքի հետեւանքով առաջացած ներքին արյունահոսությունից, մահացել:

Փաստի առթիվ  Գեղարքունիքի մարզի դատախազությունում 2006 թվականի նոյեմբերի 7-ին հարուցվել է քրեական գործ: Նույն օրը Ավետիք Մարգարյանը (ծնված 1956 թ.) ձերբակալվել է: 07.11.2006թ. Ա.Մարգարյանը   ներգրավվել է որպես մեղադրյալ եւ նրան մեղադրանք է առաջադրվել ՀՀ քրեական օրենսգրքի 112-րդ հոդվածի 2-րդ մասի 14-րդ կետով (դիտավորությամբ մեկ ուրիշին մարմնական վնասի պատճառել՝ անզգուշությամբ առաջացնելով տուժողի մահ): Ա.Մարգարյանի նկատմամբ որպես խափանման միջոց է կիրառվել  կալանքը:

Նախաքննության ընթացքում նշանակվել է դատաբժշկական փորձաքննություն, հարցաքննվել են բազմաթիվ վկաներ, կատարվել են առերեսումներ, ձեռնարկվել անհետաձգելի քննչական եւ օպերատիվ-հետախուզական միջոցառումներ:

Կատարվել եւ կատարվում են բոլոր անհրաժեշտ օպերատիվ-քննչական գործողությունները՝  վիճաբանության,  Քյարամ Ավդալյանին մարմնական վնասվածքներ պատճառվելու բոլոր հանգամանքները  պարզելու ուղղությամբ:

07.12.2006 թվականին Քյարամ Ավդալյանի ազգականները բողոքի ակցիա են կազմակերպել  Երեւան քաղաքի Բաղրամյան փողոցի վրա, որի ժամանակ հանգուցյալի մայրը՝ Գյուլիզար Ավդալյանը  նախապես իր հետ վերցրած հեղուկ վառելիքը լցրել է իր եւ  իր 3 թոռների (16 եւ 12 տարեկան) վրա ու հրկիզել, որի  հետեւանքով վերջիններս   ստացել են 2-րդ եւ 3-րդ կարգի այրվածքներ եւ տեղափոխվել հիվանդանոց:

Հրկիզման փաստի առթիվ հարուցվել է քրեական գործ, կատարվում է նախաքննություն:

ՀՀ գլխավոր դատախազը 07.12.2006թ. ընդունել է  Ք.Ավդալյանի մերձավոր ազգականներին եւ պարզաբանել, որ Ք.Ավդալյանի մահվան փաստի առթիվ հարուցված  քրեական գործի նախաքննության ընթացքում  կատարվել է ծավալուն աշխատանք, ձեռնարկվել են անհետաձգելի քննչական եւ օպերատիվ-հետախուզական միջոցառումներ եւ քննությամբ ի հայտ է բերվել ու կալանավորվել մեղավոր անձը:

ՀՀ գլխավոր դատախազի 07.12.2006թ. ցուցումով քրեական գործը վերցվել է  Գեղարքունիքի մարզի դատախազության վարույթից եւ  նախաքննության իրականացումը հանձնարարվել է ՀՀ գլխավոր դատախազության քննչական վարչությանը: